دى أوامر ولازم تتنفذ.....!!!

- السلام عليكم ورحمة الله وبركاته أستاذ غضبو

- وعليكم السلام يا أستاذ مغلوب ......تعالى أتفضل ...عايزك

يدخل أستاذ مغلوب ونفسه تمتلىء بالشكوك لطريقة كلام أستاذ غضبو الهادئة معه .....فهو لم يعتاد منه أبدا التعامل معه بهذا الهدوء .....الا اذا ....كان فى الامر شىء مرييييييييييييب ....!!!

- خير يا أستاذ غضبو

- بصراحة يا أستاذ مغلوب ....احنا محتاجين حجرة التربية الفنية بتاعتك 

وفى تلك اللحظة تأكدت شكوك أستاذ مغلوب قبل ان يكمل أستاذ غضبو حديثه  وبدأت تتضح الامور ولكن هذه المرة كان الموضوع يستحق الدهشة .... فاقترب أستاذ مغلوب اكثر من مكتب أستاذ غضبو لعله لم يسمع كلامه جيدا أو وصل اليه الأمر بشكل خاطىء ....!! أو بالاصح يتمنى أن يكون ما سمعه خطأ

- حضرتك قلت عايز حجرة التربية الفنية ........ بتاعة مين ...!!؟ أقصد حجرة التربية الفنية بتاعتى ......!!؟ .... عايزها فى ايه يا أستاذ غضبو ................!!!؟

- احنا عندنا مشكلة ومحتاجين أوضة نعملها ( حجرة عزل ) انت عارف أن فيه أوامر جت لنا بتخصيص حجرة للعزل وده للطلاب اللى متصابين بأنفلونزا الخنازير .... ومالقيناش غير حجرتك أنت المناسبة ...........أولا واسعة... ثانيا فوق وبعيدة عن باقى الطلبة وعننا كمان ....وفيها حوض... وينفع فيها اكتر من سرير اذا لاقدر الله حصلت اكتر من حالة  فى المدرسة

- تصدق أول مرة أعرف أن أوضة التربية الفنية عندى فيها المزايا دى كلها .........!!! قالها أستاذ مغلوب باستهزاء ثم تابع كلامه 

_ هو ده كلام برضه يا أستاذ غضبو ....بقى تلغى حجرة التربية الفنية علشان تعمل  (حجرة للعزل ) ....!!لمجرد ان فيها حوض وواسعة وتاخد أكتر من سرير... لأ وايه كمان بعيدة فوووووووق عنكم علشان محدش يتعدى ............!!!
يا أستاذ غضبو أنت عايز تعمل فى ايه بس ..... تجيبلى الضغط ولا السكر ...... وشغلى اللى فى الأوضة هأعمل فيه ايه .....أرميه فى الحوش .....!!! وأقعد فين بالطلبة .....فى الحمام ...!!؟ .....ازاى الكلام اللى انت بتقوله ده ...!!؟ انت ناوى تقلبها مستشفى وأوضنا تخليها عنابر ......!!؟

وكان أستاذ مغلوب فى غاية الانفعال الشديد 


- دى أوامر ولازم تتنفذ يا أستاذ مغلوب .... ومن فضلك اهدى شوية ......... ممكن تقعد بشكل مؤقت فى حجرة المجال الصناعى أو الزراعى لغاية لما الأزمة دى تعدى على خير 

- تعدى على خير .....!! يا أستاذ غضبو ...دى أزمة ... يعنى مش معروف وقت ليها هتنتهى امتى .....وطالما الأوامر جت لحضرتك أنك تخصص أوضة فى المدرسة تحت مسمى جديد ...يبقى هتفضل موجودة تحت هذا المسمى لحد ما هنطلع على المعاش أنا وسيادتك 

فما كان من أستاذ غضبو الا الرد عليه بحزم شديد متجاهلا كلامه تماما

- يا أستاذ مغلوب ..... مش عايز كلام كتير ...والوزارة تركت لى المكان المناسب لحجرة العزل ..... وأنا من وجهة نظرى شايف أن حجرتك هى أكثر حجرة مناسبة لهذا الغرض ..........ودلوقتى اتفضل فضى الأوضة من كراكيبك وحاجتك النهاردة علشان  هنجهزها بكرة  تكون ( حجرة للعزل ) .

- النهاردة ...!!!! هههههههههههههه ...كان على عينى يا أستاذ غضبو ..... أنا هأمشى علشان ألحق التدريب ....

فيرد عليه أستاذ غضبو متعجبا ....

- تدريب .....!! تدريب ايه يا أستاذ .....!!؟

- تدريب ازاى أضرب حقن ..........!! لا حول ولا قوة الا بالله

ثم ضرب أستاذ مغلوب بيده ضربة قوية على مكتب أستاذ غضبو وفى عينيه نظرة استنكار شديدة  ثم خرج من الحجرة وهو فى قمة غضبه قائلا 

- لله الامر من قبل ومن بعد 

مشاجرة كبيرة فى حجرة التربية الفنية

كانت الحصة التانية وكانت أبلة شكوى تقوم بوضع بعض اللمسات الاخيرة فى اخراج الأعمال الفنية التى تقوم بتجهيزها للمعرض....... وبعد دقائق دق جرس الحصة التالتة فتركت أبلة شكوى  ما كنت تتم عمله وخرجت لحصتها فى فصل 2/3 حيث أنها تقوم باعادة تنظيمهم واحضارهم لحجرة التربية الفنية بشكل لائق ومنظم وعند خروج أبلة شكوى كان باب الحجرة مفتوحا فدخلت أبلة حقنة الحجرة دون أن تراها أبلة شكوى ثم توجهت الى أعمالها التى كانت تتم انهائها وقامت باتلاف بعض اللوحات والبعض الآخر قامت بعمل بعض الشخابيط والخطوط بشكل سىء ثم خرجت مسرعة من الحجرة قبل قدوم أبلة شكوى مع طالباتها ....وتأكدت أنه لم يلاحظها أحد أثناء خروجها ..... ماعدا طالبة كانت تمر بجانب حجرة التربية الفنية وعندما شاهدت ابلة حقنة تخرج من الحجرة ظنت أن أبلة شكوى بالداخل ..... فدخلت كى تلقى عليها تحية الصباح وتطلب منها أن تسجل اسمها فى مجموعة النشاط الفنى .....لكنها لم تجد أحدا بالحجرة وبشىء من الفضول بدأت تقترب من الأعمال الفنية التى كانت موجودة فوق المكتب ولكنها فوجئت بأن الأعمال قد اتلفت كلها ..............!!!
وفى اثناء تلك اللحظة دخلت أبلة شكوى الحجرة ومعها الطالبات وقد فوجئت بوجود الطالبة فى الحجرة وبجوار مكتبها الموجود عليه الأعمال الفنية ..... !!! وبعد ان طلبت من الطالبات الجلوس فى أماكنهن اقتربت من الطالبة  لتسألها عن سبب تواجدها بالحجرة دون وجود أحد فيها ..... وقبل أن تبادرها الطالبة بالكلام فاجأتها ابلة شكوى بصرخة عالية موجهة الكلام لها

- اييييييييييييييييه ده ...........!!! انتى اللى عملتى كده يابنت ......!!؟

ارتبكت الطالبة أمام أبلة شكوى من صدمة الاتهام الموجه لها محاولة نفى هذا الاتهام عنها ..........

- ايه .....أنا .....!!! ؟ لا والله يا أبلة شكوى .....ازاى ....!! ...انا اعمل كده ...!! ده انا حتى كنت جاية لحضرتك علشان اسجل اسمى فى النشاط الفنى عندك .........حتى لقيت أبلة حقنة كانت خارجة بسرعة من الأوضة... مالحقيتش أقولها .....

فقاطعتها أبلة شكوى .....

- بتقولى مين ....!! أبلة حقنة .............!! .....

أكملت الطالبة حديثها وهى فى شدة الارتباك .....

- ايوة والله يا أبلة شكوى .......انا قلت اكيد عندها حصة علشان كده كانت خارجة بسرعة من الاوضة ....وكنت فاكرة ان حضرتك جوه .... واتفاجئت والله بالمنظر ده .......أنا لايمكن أعمل كده .....ده انا بحب حضرتك  جدا ...... وكان نفسى اشترك معاكى السنة اللى فاتت بس أبلة حقنة مارضيتشى وقالت لى ان النشاط السنة دى عندها هى ........ولما السنة  دى بدأت قلت أحاول أشترك مع حضرتك لأنى شفت البنات عاملين شغل جميل قوى السنة اللى فاتت وكان نفسى أعمل زيهم ...............

ثم احمر وجه الطالبة وأخذت عينيها تمتلىء بالدموع لاحساسها بالظلم الذى لحق بها ..... ولكن سرعان ما استوعبتأبلة شكوى الأمر وعلمت أن اليد الخفية التى قامت باتلاف عملها لن يكون الا يد أبلة حقنة وبشهادة الطالبة نفسها على ذلك 
ثم اقتربت أبلة شكوى من الطالبة فى محاولة منها لتهدئتها بعد ان انفجرت فى البكاء وهى تقسم أنها لم تفعلها ..........

وفى تلك الاحداث دخلت أبلة حقنة الحجرة بكل هدوء وكأنها لم تفعل شيئا 

- صباح الخير يا أبلة شكوى ...... البنت دى مالها ....بتعيط ليه ....!!!؟ ثم ألقت بنظرها على شغل أبلة شكوى ...متقنة تمثيل دور البريئة وفى اندهاش ظهر على وجهها ........

- ايه ده .....!!؟ مين اللى بهدل الشغل ده كده ....!؟ ...انتى يا بنت ...؟

فارتبكت الطالبة مرة أخرى أمام صدمة الاتهام ثانية .....

- لا والله العظيم يا أبلة حقنة مش أنا ....... ده أنا لسة كنت بأقول لأبلة شكوى انى كنت جاية أسجل اسمى فى النشاط الفنى معاها وفى أول الحصة التالتة استأذنت من أبلة رجاء علشان آجى لأبلة شكوى ولما وصلت الأوضة شفت حضرتك وانتى خارجة بسرعة وافتكرت ان أبلة شكوى جوه .....فدخلت مالقيتش حد ولقيت الشغل متبهدل كده ......ياريتنى ما دخلت ........والله العظيم هو ده اللى حصل 

 ارتبكت أبلة حقنة من كلام الطالبة وقد ظنت انه لم يكن ليراها أحد وهى تخرج من الحجرة .....ولكنها وجهت اتهاماتها سريعا للطالبة قائلة 

- كدااااااااابة .....انتى أكيد اللى عملتى كده وبتحاولى تتوهينا معاكى ..........لازم تتصرفى معاها يا أبلة شكوى ......ده شغلك اللى تعبتى فيه ......معقولة كده ...!!

فازداد بكاء الطالبة لقسوة أبلة حقنة فى اتهامها لها ....ولكن أبلة شكوى أمرت الطالبة بالانصراف لفصلها وهى تحاول ان تمسك أعصابها قبل أن تفلت ..... مما زاد غضب أبلة حقنة واحمرار وجهها لهذا  التصرف من أبلة شكوى  معاتبة اياها بالكلام 


- ازاى تمشيها ....!! دى بوظت الشغل .....ولا انتى صدقتى اللى هى قالته .... دى كدابة 


فنظرت أبلة شكوى الى أبلة حقنة نظرة كلها استنكار وقد ازداد يقينها بأن أبلة حقنة هى من أتلفت شغلها متوجهة اليها بالرد


- سيبى البنت يا أبلة حقنة ..........البنت ما عملتش حاجة .......ليه كده يا أبلة حقنة التصرفات دى أنا عملت لك ايه علشان تبوظى لى الشغل .......!!!؟  الشغل ده أنا تعبانة فيه مع الطالبات ........ليه كده حرام عليكى 


كانت عينى أبلة شكوى موجهة الى أعين أبلة حقنة وكلها غضب واستنكار شديدين وهى توجه اليها هذا الاتهام ......وارتبكت أبلة حقنة من نظرة أبلة شكوى لها ولكنها حاولت نفى الاتهام عنها بالصوت العالى والصراخ حتى لاتعطى الفرصة لها بالصاق التهمة اليها 


- انتى اتجننتى .......... أنتى بتتهمينى بانى انا اللى عملت كده .....!! والله عااااااااااااال .... مابقاش الا حتة مدرسة زيك لسة متعينة جديد تتهمنى بأنى بوظت لها الشغل ......وهوده شغل .....! امال شغلى أنا اللى قدمته السنين اللى فاتت يبقى ايه........ والمعارض وشهادات التقدير اللى أخدتها من الوزارة والمديرية والتوجيه ....كل ده ...وتقوليلى شغلك ....!!؟
انما العيب مش عليكى ...العيب على اللى ايدالك الفرصة تتطاولى على مدرستك الاولى 


وفى هذه اللحظة ازداد الشرر فى عينى أبلة شكوى فصرخت فى وجه أبلة حقنة 


- انتى كمان بتطولى لسانك ...... اتقى الله يا شيخة .......نايمة قايمة بتحلمى بى ....... حرام عليكى .....خللى عندك شوية ضمييييييير بقى 


وما كادت أبلة حقنة تسمع تلك الكلمات الا وقد تعالت صرخاتها على أبلة شكوى ودخلوا فى شجار حااااااااد احتشد على أثره عدد كبير من المدرسين داخل الحجرة  لفض الاشتباك بينهما وسرعان ما وصل الامر لابلة فتكات فقامت بتحويل كل منهما الى لجنة تحقيق بالامر وأستدعتهما الى مكتبها 

توجت أبلة شكوى وأبلة حقنة الى مكتب أبلة فتكات وسرعان ما دخلت أبلة حقنة مسرعة الى مكتب أبلة فتكات وهى فى حالة انهيار شدييييييييييييد وبكاء وتتكلم بشكل متقطع 


- شفتى يا أبلة فتكات... اهىء اهىء اهىء .... انا اتبهدلت ..... مدرسة لسة متعينة اول امبارح تطاول على مدرستها الأولى .....اهىء اهىء .... بالشتيمة وقلة الادب وطولة الايد كمان .... لأ ...وبتتهمنى أنى بوظت لها الشغل ..... أنا عايزة حقى يا ابلة فتكات وكرامتى اللى اتهانت دى ...اهىء اهىء اهىء اهىء


لم تعلق أبلة شكوى على ما تكلمت به أبلة حقنة سوى بضعة كلمات 


- انا هتنقل من المدرسة دى يا أبلة فتكات


فردت أبلة فتكات فى حزم شديد 


- انتم الاتنين متحولين للتحقيق ..... هى دى أخلاق مدرسات محترمات ...!!!؟


فكان رد أبلة شكوى فى حزم ايضا 


- اعملى تحقيق زى ما انتى عايزة يا أبلة ..... بس انا لايمكن اقعد فى المدرسة دى بعد كده ..... انا هاكتب طلب النقل وهامضيه من حضرتك وهأطلع على مكتب التوجيه بتاعنا النهاردة ان شاء الله ...........ومش هأقول غير حسبنا الله ونعم الوكيل  ..........لله الامر من قبل ومن بعد

مسئوول مهم جاااااااااااااااى

فى شكل ملحوظ غير العادة .... المدرسة مرتبة كما ينبغى وظهرت على جوانبها قصيصات الزرع والورود وملأت كل ركن من أركان المدرسة ..... ومدخل المدرسة يلمع وغاية فى النظافة الغير معتادة .... وأستاذ غضبو واقف مع حاشيته على باب المدرسة من الساعة 7 صباحا .......... ياترى فيه ايه ؟
أكيد فيه حد مهم جاى المدرسة 

هذا الحوار كان يدور فى رأس أستاذ مغلوب عندما شاهد أستاذ غضبو وباقى الوشوش السمحة متلمعة على الآخر ومفرودة الى أقصى درجة ممكنة ............


يتجه أستاذ مغلوب نحو أستاذ غضبو ليلقى عليه تحية الصباح 


- السلام عليكم يا استاذ غضبو ..... خير ان شاء الله ..... هو فيه حد جاى المدرسة .....؟ شكلك متوتر وقلقان 


يرد عليه أستاذ غضبو متجاهلا سؤاله قائلا


- دفاترك جاهزة يا استاذ .....؟ أهم حاجة دفتر السلوك والمواظبة ....... لازم يكون كله تمام 


- الحمد لله كلها تمام يا استاذ غضبو ...... أنا مش عايزك تكون قلقان ...... أى متابعة هتيجى هتلاقى شغلى على الورق مية مية زى ماهم عايزين بالظبط

- طيب ظبط ورشتك اللى أنت قاعد فيها علشان هنعدى عليكم أنا والسادة الزوار

- حاضر يا استاذ غضبو 


ويترك استاذ مغلوب استاذ غضبو وهو فى عجلة من أمره ليصعد حجرته فى الدور الخامس ليجهز ما أمره به أستاذ غضبو ويصادفه عند باب الحجرة أستاذ مكبر ويلحظ عليه انه لايستطيع التقاط أنفاسه 


- ايه الحكاية يا أستاذ مغلوب ......... مالك طالع تنهج كده ليه ......أنت كنت بتجرى على السلم ؟


فيرد عليه أستاذ مغلوب وأنفاسه تتقطع من صعوده السلم بسرعة 


- ااااه ........ السلم قطع نفسى يا مكبر ..... أصل كنت طالع بسرعة 


- وبسرعة ليه ...!! هو فيه حد بيجرى وراك....!!!؟


- أستاذ غضبو قال ان الزوار هيمروا علينا ولازم يبقى كل شىء تمام .... وأنا بصراحة لسة ما حضرتش درس النهاردة ومش مجهز دفتر الدرجات بتاعى 


- يا عم الحاج كبر دماغك دى شوية من الأفلام دى ..... وماتبقاش جبان .... الزوار دول علشان ياخدوا واجبهم عند المدير وبالسلامة يسمعونا سلاموا عليكم .... ولا هيمروا ولا هيلفوا فى المدرسة ...... وحتى اذا مروا .... هيمروا مرور الكرام  على الفصول بس ..... انما احنا ....اتنسينا من زمان فى وزارة التربية والتعليم 


- أولا انا مش جبان يا استاذ مكبر ....كل الحكاية أنى بحاول اخلص شغل ناقص عندى ممكن انه يكون سبب لكلمة سخيفة من متابع أو لفت نظر مالهوش داعى ..... ثم انى الحمد لله شغلى تمام فى التحضير والشغل الفعلى مع الطلبة ..... انت بس مش شايف كويس علشان ما بتقعدش فى المدرسة كتير .....!!!


- يابنى افهم ..... أنت عامل فى نفسك كده ليه وواجع قلبك على الفاضى .....!!؟ وكراسة تحضير وكراسة نشاط وشغل طلبة .....!!! وفى الآخر بتتساوى باللى مش بيشتغل ( زى حلاتى ) ويقبض معاك آخر الشهر ....ههههههههههههههههههه


- أنت قبلتها على نفسك يا مكبر .... لكن أنا لأ .... حتى لو اتساويت بيك فى الدنيا ..... استحالة نتساوى فى الآخرة 


ينظر أستاذ مكبر الى أستاذ مغلوب وفى ملامح وجهه سخرية واضحة .....وبعدها يتركه ويخرج من الحجرة وهو يضرب كف على كف فى حالة استعجاب واستغراب من أستاذ مغلوب


وينظر مغلوب الى السماء من نافذة الحجرة  وكأنه يبث شكواه الى الله ....وهنا ينتبه لصوت طرق على باب الحجرة فيلتفت ليجد الطالب موهوب على الباب يستأذن فى الدخول


- السلام عليكم استاذ مغلوب 


- وعليكم السلام ورحمة الله وبركاته ....تعالى يا موهوب ...اتفضل ....والدك كان هنا امبارح ايه الحكاية ...فيه شكوى منك فى المدرسة ولا ايه ...؟ ولو أنى عارف انك طالب متميز يا موهوب وكل المدرسين هنا بيحبوك


- والله يا أستاذ مغلوب اللى جاب والدى المدرسة امبارح .... هو حضرتك أولا .... وعلشان يدفع لى المصاريف ثانيا ويتابع أخبارى فى المدرسة  .....بصراحة أنا دايما بأجيب سيرتك فى البيت عندنا بكل خير وبقولهم ان حضرتك بتعلمنا حاجات كتير مفيدة وبتخلينا نشتغل ونطلع الطاقات اللى عندنا وكمان كنت دايما بأقول لبابا ان حضرتك  دايما بتحاول توفر لنا خامات نشتغل بيها على قد ما بتقدر لكن مش مكفياك الميزانية ومدير المدرسة مش بيرضى يصرف لك أى فلوس من المدرسة علشان تساعدك فى شراء خامات أكتر  تعلمنا بيها أكتر 


ابتسم أستاذ مغلوب ثم وضع يده بطريقة حانية على رأس موهوب قائلا 


- الحمد لله أنى بأترك أثر طيب فى نفوس طلابى المتميزين ......بس لما حضرتك تبقى مسؤول مهم فى بلدك ....أوعى تنسى أستاذك اللى هيبقى ساعتها عجوز ومش هتعرفه 


- ازاى يا استاذ مغلوب ..... لايمكن أى طالب ينسى أستاذه اللى بيحبه وعلمه بكل صدق وأمانة ...... حضرتك يا أستاذ مغلوب علمتنا ازاى نستغل أوقات فراغنا فى عمل حاجات مفيدة ....وكمان علمتنا أن روح الفريق والجماعة بتساعد على التفوق واننا لازم نكون أيد واحدة لانجاح العمل المتميز


فينظر له أستاذ مغلوب وعلى وجهه سعادة بالغة وكأن كلمات موهوب جاءت فى وقتها المناسب لتداوى جرح كلمات استاذ مكبر له 


- أنا سعيد جدا بيك يا موهوب ...... وأتمنى لك أنت وزمايلك باذن الله أنكم تكونوا جيل مختلف عننا يقدر يغير ويطور من بلده ويزيل عنها أى سلبيات ويملاها دايما بالايجابيات ...........قولى بقى أنت كنت عايز حاجة ؟


- أيوة.... بصراحة بابا لما جالى امبارح المدرسة وشاف حضرتك وانت بتتكلم مع أستاذ غضبو على الميزانية .... شعر قد ايه انت محتاج دعم مادى كبير علشان تقدر تكمل شغلك مع الطلبة وشعر ان أستاذ غضبو مش عايز يصرفلك فلوس من ميزانية المدرسة ..... علشان كده بابا قرر امبارح انه هيطرح موضوع الانشطة بالمدرسة وخاصة النشاط الفنى والاهتمام به فى مجلس الآباء اللى جاى ..... وبابا هو رئيس مجلس الآباء وعضو مهم جدا فيه ...... وفوق ده كله بيحب الفن بكل صوره ....... علشان كده هو بعت معايا لحضرتك مبلغ 500 جنيه علشان تجيب الخامات اللى ممكن تساعدك السنة دى لعمل معرض متميز .... ودى مش من مجلس الآباء ...دى من بابا شخصيا 


تفاجأ أستاذ مغلوب برد فعل ولى الامر هذا ..... وبتقديمه لمبلغ كبير هكذا لمدرس تربية فنية لا يعلم عنه شيئا ...... كما شعر باهانة بالغة فى حقه حيث أنه كان من المفترض أن يهتم الأستاذ غضبو بالأمر .......وفى تلك اللحظة ضم أستاذ مغلوب بقبضته على يد موهوب التى بها النقود قائلا 


- قول لبابا يا موهوب ...... أستاذ مغلوب بيشكرك جدا على اهتمامك ....ويكفى أنه مهتم بالامر وهيناقشه فى مجلس الآباء 


يحاول الطالب موهوب أن يفلت يده من قبضة استاذ مغلوب ويصر على اعطائه المبلغ قائلا 


- لكن بابا أكد على أنك لازم تاخد الفلوس يا استاذ مغلوب ............


يقاطعه أستاذ مغلوب قائلا 


- هششششش ......اسمع اللى بأقولك عليه يا موهوب ..... رجع الفلوس لبابا تانى وبلغه اللى قولتهولك .....ويالا دلوقتى اتفضل على حصتك


فيستمع موهوب الى كلام أستاذ مغلوب قائلا


- حاضر يا أستاذ مغلوب ..... بعد اذنك


ويعود أستاذ مغلوب الى  دفاتر تحضيره وقد غلبه الحزن من داخله وتراوده أفكار كثيرة تثير شجونه أكثر ثم يتنهد تنهيدة طويلة قائلا


- لله الامر من قبل ومن بعد

حصة الريادة فن وهندسة

أبلة شكوى تشرف على رايدة فصل 3/1 بينما تشرف أبلة حقنة على ريادة فصل 3/4 ولأن الطالبات يحببن أبلة شكوى فهن متعاونات معها فى كل شىء تطلبه منهن بينما طالبات فصل أبلة حقنة يكرهنها ولا يردن التعاون معها فى عمل أى  شىء للفصل ..........

والآن حصة الريادة وسوف نستعرض هنا كيف تدير كل أستاذة منهن ريادة فصلها 

.............أبلة شكوى فى فصل ...3/1

-  السلام عليكن ورحمة الله وبركاته 

- وعليكى السلام ورحمة الله وبركاته 

- كل عام وأنتن بخير يا بنات ............السنة دى ان شاء الله هتكون سنة كلها نشاط وعمل وجدية ...........وطبعا أغلبكم كان عندى فى الصف الأول والثانى الاعدادى علشان كده هيكون فيه نشاط أكبر عليكم ومسئولية أكتر ...........أنا دلوقتى هأقسم الفصل لأربع مجموعات .........كل مجموعة هيكون على رأسها مسئولة واحدة منكم لتتابع عمل المجموعات الأربعة ودلوقتى أنا رشحت بعض الأسماء منكم اللى هتكون قائدة  لكل مجموعة وده طبعا لتفقوهن الدراسى وقدرتهن على الريادة وطبعا كل قائدة مجموعة عليها اختيار مجموعتها بنفسها وتكتب لى الاسماء معاها فى ورقة بشرط أن كل مجموعة لا تزيد عن 10 طالبات 

 والأسماء اللى اختارتها هى 

الطالبة مواهب قائدة المجموعة الأولى 

الطالبة أحلام قائدة المجموعة التانية 

الطالبة وصال قائدة المجموعة التالتة 

الطالبة منيرة قائدة المجموعة الرابعة 

أما قائدة المجموعات الأربعة هتكون الطالبة ذكية وهى من الطالبات المثاليات بالتأكيد والكل يجمع على تفوقها وذكاءها وأدبها كمان

ودلوقتى أنا هأوزع على كل رئيسة مجموعة المهام اللى هتقوم بيها مع المجموعة بتاعتها والمطلوب تنفيذ خطة العمل على مراحل منظمة وأى مشكلة هتقابلكم هيتم تبليغ قائدة المجموعات الطالبة ذكية وهتكتب لى المشكلة فى تقرير خاص وهنحاول نحلها باذن الله .............ودلوقتى حد عنده أى سؤال ...........

وعلى بعد خطوات من فصل أبلة شكوى كانت هناك أبلة حقنة فى حصة الريادة لفصل 3/4

- اترزعوا ..........مش عايزة أسمع أى صوت لغاية لما آجى 

وهنا تخرج أبلة حقنة من الفصل وفى يدها كوب من الشاى لتطل من نافذة فصل 3/1 على أبلة شكوى مع طالبتها وأخذت تنصت الى قليل من حديثها مع الطالبات وفى هذه اللحظة تشعر أبلة حقنة بيد  تربت على كتفها قائلة ....

- واقفة عندك ليه كده يا ابلة حقنة ........انتى مش المفروض عندك حصة ريادة لفصل 3/4 ...........؟

تهتز أبلة حقنة فى كلماتها ....وتحاول ان تفكر فى الخروج من هذا المأزق قائلة 

-والله يا ابلة فتكات شعرت ببعض الصداع فاخذت اسبرين وفنجان شاى وخرجت شوية من الفصل ..... وانا واقفة سمعت صوت ضحك عالى ومرقعة وهيصة فى فصل 3/1 .......جيت اشوف فيه ايه اللى بيحصل ......ده ولا كأننا فى كباريه يا أبلة والله ...!!!

- طيب ..أدخلى فصلك انتى وأنا هأدخل الفصل أشوف فيه ايه 

دخلت أبلة حقنة فصلها والابتسامة الماكرة تملأ وجهها .....وتوجهت ثانية للبنات بشكل حازم -وقد كن انشغلن بالرغى مع بعضهن البعض - تصرخ فى وجههن 

- بس يابت انتى وهى ...........ايه الرغى ده صدعتونى 

ثم نادت على احدى الطالبات المقربات اليها فى هذا الفصل لأنها تفتن دائما على صديقاتها وتأتى لها بالأخبار عن فصول أبلة شكوى 

- تعالى يا فتانة ......دلوقتى عايزاكى تجمعى فلوس من الفصل علشان نزينه ....كل بت تدفع خمسة جنيه واللى ما تدفعش علمى عليها وانا هعرف أخليها تدفع ازاى 

وهنا تقاطعها رائدة الفصل وكانت طالبة متميزة وهادئة ورقيقة قائلة 

- يا أبلة حقنة .....المفروض أن أنا رائدة الفصل ......وأنا المسئولة عن تنظيم شكل الفصل وأى فلوس تتلم تكون تحت اشرافى أنا .....وليه ما نعملش زى أبلة شكوى ما بتعمل مع طالباتها ونقسم الفصل لمجموعات وكل مجموعة تعمل حاجة باللى تقدر عليه ؟

وعندما نطقت الطالبة اسم أبلة شكوى أمامها ازداد غضبها .....وصرخت فى وجهها قائلة 

- ماحدش طلب منك تتكلمى ياست المنظمة ......ثم انتى لسة ليكى شغل تانى هتعمليه معايا ......انما لم الفلوس مسئولية فتانة ............ودلوقتى عايزة كل واحدة تجيب لنا معاها شوية حاجات من البيت ..... زى فازة - مفرش حلو - مسدس شمع - ورق كوريشة - ورق سيلوفان ......و الفلوس عايزاها تتلم قبل نهاية الأسبوع ..............فاهمين يا بقر ...؟ واللى مش هتدفع هتسقط فى أعمال السنة وهخرب بيتها

وعلى الجانب الآخر كانت أبلة شكوى تدير فصلها بشكل منظم .........فأرادت أبلة حقنة أن تقلل من شأن أبلة شكوى أمام طالباتها وذهبت لفصلها بحجة التنبيه على البنات باحضار أدواتهن فى حصة التربية الفنية

وفى هذه اللحظة تدخل أبلة حقنة بدون استئذان وهى بوجه عابس وغاضب متوجهة الى الطالبات لتخبرهن بنبأ هام .........!! ولم تعيرأى اهتمام لأبلة شكوى متوجهة بحديثها الى الطالبات 

- بقول ايه يا حلوة انتى وهى .........أنا عليكم بكرة الحصة الثانية والتالتة ......على الله واحدة تيجى  ناسية أدواتها وهى هتشوف المر بعينه .........ده غير ما هسقطها فى أعمال السنة 

تنظر الطالبات باستياء لأبلة حقنة ثم تلتفت كل طالبة لزميلتها التى بجانبها محاولة الغمز واللمز عليها وتخفين وجهوههن حتى لا تلاحظ أبلة حقنة ضحكهن ....ولكنها بالفعل لاحظت ذلك 

فتوجهت اليهن بحديث غاضب والشرر يتطاير من عينيها 

- بتضحكى على ايه يا حيوانة انتى وهى .......هو أنا بأقول نكت ..........ماشى يا سنة تالتة ان ما وريتكم ......خللى اللى مشجعاكم على كده تنفعكم 

وتلقى أبلة حقنة نظرة ساخطة وبها غضب شديد على أبلة شكوى وهى متجهة لباب الخروج من الفصل متجاهلة اياها بأى كلمة 

حاولت أبلة شكوى أن تسيطر على أعصابها وتجاهلت ما فعلته أبلة حقنة بالفصل لتكمل حديثها مع الطالبات 

-  ودلوقتى يا بنات اتفقنا على اللى قولناه .....؟ احنا عايزين باذن الله ناخد جايزة أحسن فصل مش بس فى تجميل الفصل .....لأ .....وفى مستوى تفوقكم الدراسى كمان 

وهنا يدق جرس الحصة لتخرج أبلة شكوى من الفصل لتجد امامها أبلة حقنة منتظراها فى الخارج وهى واضعة ذراعيها فوق بعضهما البعض  وفى عينيها نظرة تحدى واضحة ....... وعندما حاولت أبلة شكوى تجاهلها والسير فى طريقها ..... قاطعتها أبلة حقنة قائلة 

- أبلة فتكات عايزاكى تحت عندها فى المكتب دلوقتى

ثم تترك أبلة حقنة أبلة شكوى بعد أن رمقتها بنظرة كانت أقصى من السابقة التى رمقتها بها فى الفصل  ............وهنا شعرت أبلة شكوى بأن أبلة حقنة قد دبرت شيئا ما لتثيرعليها المشاكل عند أبلة فتكات ........ولكنها لم يكن بيدها حيلة الا أن تذهب لأبلة فتكات وتعرف الأمر بنفسها 

- السلام عليكى أبلة فتكات 

- وعليكى السلام يا أبلة شكوى .........

يا أبلة شكوى ايه الحكاية .....انتى مش هتبطلى مشاكل مع أبلة حقنة ؟.

- ويا ترى عملت ايه المرة دى يا ابلة فتكات ..........!!!؟

انتى عارفة كويس .............ازاى يا استاذة تجرأى البنات وتغمزيلهم من ورا أبلة حقنة وهى بتنبه عليهم على أدواتهم علشان يضحكوا ويتريقوا عليها .............الكلام ده ميصحش

- والله ما حصل يا أبلة فتكات .......ده هى اللى دخلت على الفصل بطريقة عجيبة وقعدت تخوف البنات وتهددهم بأن اللى مش هتجيب أدواتها بكرة هتضربها وتسقطها فى أعمال السنة ...........وحضرتك عارفة البنات ....علشان يغيظوا مدرسة .....يعملوا أنهم بيضحكوا عليها ..........ولما لاحظتهم  أبلة حقنة شتمتهم وخرجت وكاننى مش موجودة فى الفصل 

- لأ .....بس الكلام اللى وصلنى منها غير كده وانك السبب فى ضحك البنات ده غير انها بتقول انك دايما مش مكملة دفاترك وتحضيرك ومش بتتعاونى معاها فى شغل المعرض العام 

- أنا ........!!!؟ ....والله يا أبلة فتكات  الكلام ده مش صحيح 

هى علشان المدرسة الأولى يبقى كل كلامها صح .......!!!!!!؟ 

- عامة يا أبلة شكوى أنا مش عايزة مشاكل بينكم تانى ........أنا كفاية على مشاكل المدرسة والمدرسين كلهم مش فاضية انا بقى لمشاكل التربية الفنية كمان 

- أبلة فتكات .........أنا هريح أبلة حقنة وأنقل نفسى من المدرسة خالص .....الوضع كده بصراحة بقى يزهق ويتعب ........بعد اذنك انا عندى حصة دلوقتى

وتخرج أبلة شكوى من حجرة أبلة فتكات وهى فى قمة غضبها وعند باب الحجرة تفاجأ بأبلة حقنة تقف بجواره وعلى وجهها ابتسامة شماتة فتنظر لها أبلة شكوى وترد لها ابتسامة اخرى ولكنها ابتسامة سخرية قائلة 

- بقولك يا أبلة حقنة ...........الا هم ليه سموكى  (حقنة ) ....!!!؟ 

فتعتدل  أبلة حقنة فى وقفتها لكلمة أبلة شكوى لها  وتتغير ملامح وجهها وتزداد نظرتها لأبلة شكوى بكل غضب وحقد عليها ....فتتركها ابلة شكوى وهى متعجبة من كل هذا الحقد والغضب الذى يملأ عين أبلة حقنة منها ولا تعرف له سبب 

وبدأت تأخذ خطواتها نحو ممر الحجرة وهى تقول 

- لله الأمر من قبل ومن بعد









 

ميزانية النشاط ...............مشكلة المشاكل

دايما ميزانية التربية الفنية مشكلة المشاكل اللى بيواجهها استاذ مغلوب مع ادارة المدرسة .....مع ان ادارة المدرسة ميزانيتها كبيرة ......!!!

ويدخل استاذ مغلوب على استاذ غضبو ليحاول أن يخصص له مبلغ اكبر من ميزانية التربية الفنية الحالية علشان يشترى خامات اكتر تساعده فى انتاج فنى متنوع  بالمدرسة .....وكانت نتيجة هذا ما سوف تشاهدونه ....!

_ السلام عليكم استاذ غضبو

_ وعليكم السلام ......أفندم ......وايه الورقة اللى فى ايدك دى .....أوعى تقول اذن .....انت عندك حصص كتير النهاردة ...وزميلك خرج فى مأمورية 


_ لا لا يا أستاذ غضبو .....ده مش اذن .....دى مقايسة مادة التربية الفنية .....عايز حضرتك تشوفها وتمضى لى عليها 


_ آه ....طيب ...هات كده أما أشوفها 
ايه ده .......؟ عايز كاااااااااااااام .......!!؟ 500 جنيه ....؟ ليه ......هتشترى مكتبة الوان ولا ايه ....؟


_ والله يا أستاذ غضبو أنا محتاج  السنة دى أجيب شوية خامات جديدة محتاجها فى التربية الفنية .....والاوضة كمان محتاجة تتبيض علشان بقالها سنين ما اتبيضتش ومحتاج أجيب خشب وأدوات يشتغل بيهم الأولاد فى الحصة علشان نعمل معرض حلو السنة دى 


_ حيلك حيلك .........أنت سخن ولا عيان ....ولا ايه ....؟ منين ده كله ...؟ ده انتم ميزانيتكم يادوب 50 جنيه....... مش 500 جنيه زى ما انت كاتب كده .....!!


_ ما هو يا استاذ غضبو أنا عشمان فى كرم حضرتك وتقديرك للفن والجمال والذوق انك تزود لنا المبلغ السنة دى من بند مجلس الآباء او أى بند نشاط تانى فى المدرسة .....حتى يبقى السنة دى عملنا حاجة  جديدة باسم المدرسة 


_ يا استاذ يا فنان ....... بنود مجلس الآباء دى يا دوب تغطى مصاريف صيانة المدرسة .......تصليح حنفيات ......تصليح شبابيك .....لمبة محروقة ......بلاعات مسدودة  ..... مش تقولى ....خامات ونشاط فنى ...........!!!


وفى تلك اللحظة يدخل على أستاذ غضبو أحد أولياء الأمور ليلقى بتحية السلام عليه  فينتبه له الأستاذ غضبو ويرد عليه متجاهلا أستاذ مغلوب والورقة التى فى يده 


_ وعليكم السلام ورحمة الله وبركاته .....أهلا أستاذ نجاح ...اتفضل 


ثم يلتفت مرة أخرى الى أستاذ مغلوب متحدثا اليه بلهجة اللامبالاة 


_ طيب يا استاذ مغلوب ....اطلع على حصصك دلوقتى ....وابعت لى الدفاتر أمضيهالك ومتنساش دفتر السلوك والمواظبة


_ لكن يا أستاذ غضبو انا محتاج فلوس علشان أشترى الخامات النهاردة علشان  نلحق نشتغل .............

وهنا يقاطعه أستاذ غضبو ...


_ يا استاذ قلت لك بعدين ......انت مش شايف انى مش فاضى دلوقتى


ويتدخل ولى الامر فى هذا الحوار موجها كلامه لأستاذ مغلوب ....


_ هو حضرتك استاذ مغلوب .....؟ أنا ابنى عندك فى التربية الفنية .....اسمه ...موهوب .....ده بيحبك جدااااااااااااا ......وما فيش على لسانه غير سيرتك وقد ايه انت بتهتم بالطلبة وبتشجعهم دايما على اظهار  ابداعاتهم .....ده ابنى موهوب مش  سايب حاجة فى البيت قديمة الا لما بيعيد شكلها مرة تانية فى هيئة جديدة .......ودايما يقول استاذ مغلوب قال لنا ....لازم تستغلوا الحاجات القديمة فى البيت وتعيدوا صياغتها من أول وجديد فى شكل تانى جمالى ................... بصراحة احنا ساعات بنقعد جنبه أنا ووالدته نتعلم منه حاجات جديدة عمرنا ما اتعلمناها قبل كده ......الله يباركلك يا استاذ مغلوب


_ تشرفت بمعرفتك يا أفندم ......موهوب  طالب متميز فعلا .....


وهنا يقاطع استاذ غضبو الحوار .....ويحاول أن يكون طرفا فى مدح أستاذ مغلوب .........


_ طبعا يا استاذ ناجح ............. هو احنا عندنا فى المدرسة الا استاذ مغلوب ...ده  الفنان  بتاعنا ......واحنا بنحاول على قد ما نقدر نوفر له كل الامكانيات المادية علشان يطلع لنا طلبة مبدعين 


وهنا ينظر أستاذ مغلوب الى أستاذ غضبو نظرة بها شىء من الاستغراب والتعجب لما يسمعه من كلمات مدح فيه يسمعها من أستاذ غضبو لأول مرة فى حياته 


ثم يسترسل أستاذ غضبو فى حديثه قائلا ...........


_ أستاذ مغلوب كان لسة بيكلمنى فى موضوع الميزانية بتاعتهم ...وأنا طبعا كمدير للمدرسة ومقدر للفن والجمال والذوق .......هأوفر لأستاذ مغلوب كل اللى هو عايزه  علشان يشترى خامات وأدوات للطلبة علشان يطلعولنا ابداعاتهم الجميلة ........احم احم احم .............خلاص يا استاذ مغلوب تقدر تتفضل انت دلوقتى وانا هأشوف لك موضوع الميزانية ده 


ينظر أستاذ مغلوب الى الاستاذ غضبو وهو غير واثق من كلامه ولكن ليس بيده شىء ليفعله .......فيترك له الطلب على مكتبه ثم يستأذن ويخرج من الحجرة وهو متوجه بالكلام الى استاذ غضبو قائلا ....


_ لله الامر من قبل ومن بعد

أعزائى القراء

تغيبت عاما كاملا على اكمال مدونتى ..... ولكن حدثت لى ظروف كثيرة منعتنى من متابعة استكمال باقى حلقات مدونتى ...... ولكن عندما كنت ادير محرك البحث من ايام قليلة وجدت ان مدونتى قد تم سرقتها من احدى العضوات بأحد المنتديات وبكل بجاحة  نسخت مدونتى عندها بين  مدوناتها - المسروقة هى الأخرى بالتأكيد - على أنها من بنات أفكارها ..... العجيب اننى عندما توقفت هذه الفترة عن الكتابة توقفت هى عن سرقة باقى مدوناتى أيضا بحجة ان الظروف السياسية المحيطة بنا قد أصابتها بالاحباط وعدم القدرة على استكمال المدونة ................!!!! 

حقيقة حزنت بشدة على من يستحلوا لأنفسهم سرقة أعمال غيرهم وينسبونها لأنفسهم .................ولكنى لن أسكت على هذا الهراء .............وسوف أقوم بفضحها فى المنتدى وأظهر حقيقتها السيئة ........وسوف أتخذ كل الاجراءت اللازمة فى استعادة حقى فى الملكية الفكرية التى قامت بسرقتها ......لصة المدونات هذه  .....!!!!!!!!!!!!!