صينى ...صينى ...لا للصينى

- السلام عليكم يا أبلة شكوى

- وعليكم السلام ورحمة الله وبركاته ...أهلا اهلا أبلة مؤمنة ...منورة اوضة التربية الفنية

- منورة بأصحابها يا حبيبتى ....انتى ماعندكيش حصص دلوقتى ؟

- لأ...أنا عندى الحصص اللى جاية

- أمال أبلة حقنة فين ...؟

- غايبة النهاردة ... وبلغت المدرسة ان ابنها تعبان شوية

- لا حول ولا قوة الا بالله ...عموما أنا هبقى اكلمها واطمئن على صحة الولد ...بقولك ...عندك حاجات صينى جديدة من اللى جيبتيهم الشهر اللى فات ؟

- أيوة عندى ...بس انتى عارفة أبلة حقنة ملحقانى اليومين دول وبتدورلى على أى مصيبة توقعنى فيها

- يا ستى ...أجيلك البيت وآخد منك شوية حاجات كده محتاجالها

- طيب ....عموما بعد المدرسة تعالى معايا البيت ...وشوفى اللى انتى عايزاه

- ماشى الكلام يا قمر

وبعد انتهاء اليوم الدراسى ذهبت أبلة مؤمنة مع أبلة شكوى الى منزلها لترى آخر منتجات البضائع الصينية عندها

تدخل أبلة شكوى من باب الشقة وتلقى تحية السلام لينتبه من فى المنزل لصوتها ولم يكن سوى والدها فقط أما أختيها لم يحضرا من المدرسة بعد...فرد والدها من حجرته
- وعليكم السلام ورحمة الله وبركاته ...انتى جيتى يا شكوى؟

- أيوة يا بابا ....ومعايا ضيفة

- أهلا وسهلا بالضيفة يا حبيبتى.... دخليها الصالون على بال أما أعملكم حاجة تشربوها

وتدخل أبلة شكوى مع أبلة مؤمنة وتوجهها لتجلس فى حجرة الصالون وتذهب الى والدها فى حجرته لتطبع على يده قبلة حانية

- عامل ايه دلوقتى يا حبيبى

- الحمد لله يا حبيبتى ...معاكى مين؟

- دى ابلة مؤمنة زميلتى فى المدرسة جاية تقعد معايا شوية

- أهلا بيها يا بنتى ...هأقوم أنا أعملكم حاجة تشربوها ولا اجيبلكم تتغدوا ؟

- ما تتعبش نفسك أنا هاعمل حاجة نشربها ونقعد شوية مع بعض وخليك انت مستريح

وتدخل أبلة شكوى على أبلة مؤمنة بكوبان من الكاكاو الساخن ذو رائحة طيبة جميلة

- تسلم ايديك يا حبيبتى ...لازم تتعبى نفسك ؟ ياستى أنا ماعنديش وقت للضيافة دى ... أنا جاية أقعد شوية معاكى وهمشى على طول

- يا ستى انتى مستعجلة على ايه؟ ما احنا قاعدين مع بعض ...وأنا هأقوم أجيبلك الحاجات تتفرجى عليها

وفى دقائق معدودة جاءت ابلة شكوى من الحجرة الأخرى ومعها الكثير من الأكياس التى تحمل عنوان صنع فى الصين

- ورينا يا ستى الجديد اللى عندك

- شوفى الملايات دى ... وايه رأيك فى المفارش دى كمان ؟

- والله كلها جميلة ...بس يا خسارة

- ايييييييييييه ....فيه حاجة مش عجباكى ؟

- ااه

- ايه هى؟

- مش مكتوب عليها (صناعة بلدنا )

- يا ختى انتى كمان ...هو احنا بلادنا فيها صناعة من أصله؟

- ماهو اللى خلا بلدنا ما فيهاش صناعة حضرتك واللى زيك ...واتحولنا لشعوب مستهلكة على ايديكم والحمد لله

- يا أبلة مؤمنة ما احنا شعوب مستهلكة من زمااااااااان

- ما هو لوكل واحد صاحب حرفة أو صنعة اتمسك بصنعته وعلم اجيال كتير فيها ماكنش ده بقه حالنا معتمدين على كل حاجة فى الصناعة الصينية...ده ناقص يصدورلنا بنى آدميين ..!!

- بتقولى فيها ...طب ياريت يصدرولنا عرسان حلوة بس يكون شعرها أصفر وعينيها زرقا  ...ويكون عندهم شقق وبيشتغلوا أحلى شغلانة

- ههههههههه....والله مش بعيد عليهم ...بس حقيقى يا شكوى أنا بتكلم جد ...يعنى واحدة زيك بسم الله ما شاء الله ممتازة فى الشغل اليدوى ..ليه ماتعمليش مشروع صغير وتبدأى بيه وتستفيدى من مواهبك ديه..؟

- طب ما انا بأستفيد كده برضه ...وأسرع كمان

- يا شكوى والله انتى لو اشتغلتى بايدك هطلعى حاجات أحلى من المنتجات دى بكتير ...بس انتى عايزة تشجيع وابداى على قدك وأنا معاكى... لو تحبى أكون شريكة ماديا ومساعدة كمان ...ها ...قولتى ايه ؟

- يا ابلة مؤمنة أنا من جواى مقتنعة بكل اللى بتقوليه ...بس خايفة من مشاكل كتير ممكن تقابلنى وماأقدرش ساعتها أحلها لوحدى ...وانتى عارفة كمان الظروف والحياة مشاكلهم كفاية

- يا ستى اتوكلى على الله وما تخافيش ...دى الأرزاق بيد الله ...وابداى انتى بس يمكن تكون فتحة خير عليكى وعلى غيرك ...وساعتها هتتغير حاجات كتير ونشجع كلنا المحلى ونرفض نشترى البضايع الصينى

- عموما سيبنى أفكر فى الموضوع

- طيب .. وأنا بقه مش هشترى الا أول حاجة تصنعها ايديكى انتى ...يالا أسيبك بقه علشان اتأخرت

- ازاى ..؟ احنا هنتغدى سوا النهاردة ..ده أنا عاملة صينية مكرونة بالباشاميل ....تهبل

- ألف هنا للى هياكلها ...بس خليها مرة تانية وأنا هقضى اليوم كله معاكى ...يالا أسيبك فى رعاية الله

وتركت أبلة مؤمنة أبلة شكوى ورأسها يدور به أفكار كثيرة وعندما شعرت بالتعب من كثرة التفكير أطلت بوجهها من النافذة رافعة رأسها الى السماء داعية الله أن يرشدها للطريق الصحيح قائلة

- لله الامر من قبل ومن بعد

خليك معايا تابع بقية الأحداث ...ده واقع بيعيشه معلم التربية الفنية

بأحاول أقدم مشكلته مع المنظومة التعليمية الغريبة التى لاتقدر أهمية دوره

معلم التربية الفنية هو أهم عضو فى العملية التعليمية

ولكن

هل من مجيب لشكواااااااااااااه

حصص الاحتياطى

- السلام عليكم يا أستاذ مغلوب ... معلش حضرتك ممكن تمضى لى على الحصص دى لأستاذ مكبر علشان غايب النهاردة

- ايه...غايب ليه...؟ده عنده أربع حصص النهاردة وأنا عندى أربع حصص زيه ...لأ ده حرام هأشتغل اليوم كله ...؟

- يا استاذ مغلوب ما أنت عارف كل مادة بتشيل نفسها فى الغياب ...ابقى غيب انت كمان فى يوم زحمة حصص عندك ودبسه فيهم

- يا أستاذ محلسة انت عارف ان الأستاذ مكبر بيكبر دماغه فى حاجات كتير وعلى طول غايب يعنى أنا شايل الليلة لوحدى ..ده غير مابلاقيك جايب لى احتياطى حصص من برة المادة ... الرحمة حلوة يا استاذ محلسة

- أنا ..؟ أبدا والله ...دى كانت مرة واحدة علشان كان فيه غياب كتير بالمدرسة ...وعموما يا سيدى ما تزعلش أنا هريحك الأسبوع الجاى كله من الاحتياطى ...ها.... مبسوط ؟

- الكلام ده بأسمعه كل مرة بتجيلى فيها تمضينى على الاحتياطى ...وبعدين أنا الحصة السابعة والتامنة شغال فيها..... هلم العيال دى كلها ازاى ؟

- يا سيدى ما أنت الأوضة عندك بسم الله ماشاء الله واسعة وتساع من الحبايب ألف وأهم حصتين وهيعدوا 

- هو فرح يا أستاذ محلسة ...انت عارف شقاوة الطلبة مع بعضها فى الحصة وأنا عايز أركز فى الشغل مع الطلبة بتوعى 

- ياعم الحاج شغل ايه....؟ ريح دماغك ...يعنى هو الطالب لما تطلعه فنان هيشتغل ايه؟ شحات... ولا مؤاخذة يا أستاذ مغلوب ...أنا قصدى ان الفن مابيأكلشى عيش دلوقتى  ومرتبات الحكومة ضعيفة زى ما أنت عارف ...يعنى مش هيعرف يفتح بيت طول حياته .... لامؤاخذة ...يظهر انى عكيت ولبخت ... أوعى تزعل منى يا أستاذ مغلوب ... وبعدين بصراحة كده شغلتك دى لوحدها ما تأكلش عيش حاف ...ما تحاول تشوف شغلة تانية جنب شغل الحكومة وتعرف تفتح بيت وربنا ساعتها هيعترك فى بنت الحلال

- المشكلة يا أستاذ محلسة انى جواية فعلا طاقات فنان يقدر يعمل حاجات كتير بس  حاسس انى متسلسل من ايدى ورجلى 

- طب بقولك ايه ما تسافر أى بلد من اللى بتقدر طاقاتك دى ...طالما بلدك مش معترفة بيك

- لو حسبتها هتلاقيها هى هى ...هنا بيضيع أحلى سنين عمرى فى العمل الروتينى.... والمرتب البسيط  .... وهناك بيضيع عمرى برضه بعيد عن أهلى وأصحابى والناس اللى بحبهم.... والفلوس كتيرة بس مالهاش طعم من غير حبايبك وناسك

- يا سيدى الفلوس هى كل حاجة دلوقتى ... ما أنت أهه ...لا عارف تتجوز ولا عارف تفتح بيت ... واللى زيك يا استاذ مغلوب معاه دلوقتى عيلين وتلاتة ..ماتزعلش منى انت بقة اللى مابتسعاش ورا لقمة عيشك ...وآديك شايف الشغل هنا.... انت متمرمط فيه وببلاش 

- أنا لى طموحات هنا ومش هسيب هنا 

- طيب أسيبك أنا بقه لطموحات وأحلامك اللى مش جايبة همها ...وأوعى تنسى الحصص 

وترك أستاذ محلسة الاستاذ مغلوب وقد زاده هم على هم ...ثم رفع رأسه الى سقف الحجرة وكأنه يبث همومه الى الله قائلا

- لله الأمر من قبل ومن بعد     

الأسبوع الأول من الدراسة

تدخل أبلة شكوى حجرة التربية الفنية وهى فى حالة غضب شديد متوجهة الى أبلة حقنة زميلتها وهى تحاول أن تمسك أعصابها وتكلمها بكل هدوء

- يا أستاذة حقنة احنا مش كنا اتفقنا على الجدول قبل ما يحطه أستاذ ملتزم ؟ايه بقه اللى حصل وغير الجدول بالشكل المهبب ده؟.... ده أنا كده كل الحصص الأخيرة عندى....ده غير الاحتياطى ...وغير النشاط الفنى اللى أنا شايلاه لوحدى ...والمعرض العام اللى المفروض أحضرله من دلوقتى ...وكمان أنا كده أصبحت هأحضر ثلاث مناهج أولى وتانية وتالتة اعدادى

- وماله يا أستاذة ...أمال حضرتك عايزة تقبضى مرتبك آخر الشهر بدون ما تشتغلى

- أنا اللى مابشتغلش برضه يا أبلة ..هو يعنى حضرتك بتعملى كده علشان أزهق وابقى زيك آجى كل يوم أفطر وأشرب الشاى وأجيب فى سيرة أستاذ فلان وسيرة أبلة فلانة..؟ هو ده الشغل فى نظر حضرتك ؟ .... والاسم بس انك معلم أول وبتابعى كشاكيل تحضيرى ودفاترى وتقرفينى على الكلمة والجملة والحرف فى الكشكول

- يا أبلة لاحظى انك خرجت عن حدودك ...أى كلمة زيادة هأقدم فيكى شكوى رسمية انك بتشجعى الطالبات على ترك حصصهم الأساسية علشان يتلموا حواليكى هنا باسم النشاط الفنى وانتى بتفتحى عينيهم على الكلام الفارغ

- كلام فارغ ايه يا استاذة ....الطالبات دول بيحبونى وبيحكولى على كل مشاكلهم ومن المفروض على كمربية أسمع لهم وأوجههم وأقولهم التصرف الصح من الغلط ...ولعلم حضرتك الطالبات دى متفوقات فى دراستهم جدا ...وعارفين ينظموا وقتهم للمذاكرة وللترفيه وكمان لتنمية مواهبهم وقدراتهم

- ومش عيب برضه يا مربية يا فاضلة لما تشجعى البنات يتطاولوا على فى الحصة وتدخلى فى دماغهم انى مابفهمش حاجة فى الفن من اصله وانى ماعنديش ذوق فى اختيار الالوان؟

- يا ابلة حقنة الطالبات مش محتاجين انى أقولهم حاجة من دى ..هم شاعرين ان حضرتك بعيدة عنهم ومش مهتمة بيهم وبتكونى زهقانة من حصصهم... حتى لما بيجوا يسألوكى فى تلوين الموضوع بتقوليلهم الموضوع على السبورة ومش عايزة كلام والا هأضرب الفصل كله

- ايه يا أبلة اللى انتى بتقوليه ده...؟ هى حصلت كمان ان البنات يشتكوا المدرسة الأولى للمادة للمدرسة اللى تحت منها ...بس العيب مش عليهم ...العيب على اللى شجعهم على قلة الأدب دى

- يا أبلة من فضلك أنا ما أسمحلكيش تكلمينى بالطريقة دى

- تسمحى ايه ... وما تسمحيش ايه يا أستاذة ...أنا هأكتب فيكى تقرير دلوقتى بكل اللى الكلام ده لأبلة فتكات ... ويا أنا يا انتى فى المدرسة

وتترك أبلة حقنة الحجرة وهى شديدة الغضب وتقوم بسحب الباب من خلفها بشدة لتترك صدى شديد يرن فى أذن أبلة شكوى... فتتنهد بحالة احباط شديدة وترفع رأسها للسماء وتقول
- لله الامر من قبل ومن بعد

السيرة الذاتية لأبطال الدراما الكوميدية

السيرة الذاتية لمغلوب


الاسم / مغلوب على أمره ( بكسر اللام .... وبفتح الميم والراء ...أوعوا حد يقراها غلط )
السن / 35 سنة
الوظيفة/ معلم اول تربية فنية بعد ما شعره شاب
الحالة الاجتماعية / أعزب ومش ناوى يتجوز
العنوان / مازال عم على بيصرف عليه وعلى اخواته المتخرجين ومش لاقيين شغل ( الله يعينه )
الخبرات / نسى كل اللى اتعلمه عن الفن
مش لاقى أى وظيفة تقبله بعد الضهر
المؤهل / بكالوريوس فى الفن الجميل
المدرسة التى يعمل بها حاليا / مدرسة الاصلاح والتهذيب لجيل المستقبل الثانوية بنين

السيرة الذاتية لشكوى

 الاسم / شكوى جابر عبد القوى
السن / 30 سنة
الوظيففة / معلم تربية فنية ممتازة ( فى الطبيخ وخصوصا المكرونة بالباشاميل )
العنوان / مازالت عند عم جابر تنتظر فرج ( أقصد الفرج )
الخبرات / حزام أسود فى الدفاع عن النفس
بيع المنتجات الصينية للمدرسين ( علشان بتجهز نفسها )
المؤهل / بكالوريوس فى الفن الجميل
المدرسة التى تعمل بها حاليا / مدرسة التفاؤل والامل الاعدادية للبنات ( اللى ناويين ياخدوا الاعدادية ويتجوزا ويقعدوا فى البيت )

مقدمة

يوميات شكوة مغلوب هى يوميات من خواطرى الشخصية قد يتصادف عند البعض وجود أحداث مشابهة قد حدثت معه ولكنها أحداث ليس الغرض منها السخرية من المعلم بوجه عام ولكن الغرض منها هوتسليط الضوء على السلبيات التى يحتك بها المعلم داخل المنظومة التعليمية والا تجاه الى الايجابيات الموجودة داخلها وتسليط الضوء عليها أيضا لسد الفجوة الكبيرة بين هذا وذاك وايجاد الحلول والاقتراحات المناسبة للتطوير الحقيقى للعملية التعليمية بشكل جاد وسليم وليس مجرد حبر على ورق

وسوف يتم ذلك من خلال تعليقات القراء على اليوميات

والاحداث الدرامية كلها سوف تسير بشكل متسلسل مع بطلى هذه الدراما وهما مغلوب وشكوى ( معلما تربية فنية) يتعرضان لسلسة من المواقف والاحداث داخل هذه المنظومة وقد اخترت هذه المادة لأننى معلمة تربية فنية وأردت أن أعرض بشكل جدى أهمية دور معلم التربية الفنية فى المنظومة التعليمية وكيف يستفاد منه عمليا وبشكل لائق ومحترم فى تلك المنظومة دون المساس بكرامته أو اهدار حقوقه المعنوية والمادية و الحفاظ أيضا على مادة التربية الفنية كمادة أساسية لتخريج طاقات ومواهب صحية وسليمة تفيد المجتمع من حيث الارتقاء بالمستوى العام للذوق والفن ...والأحداث الدرامية داخل اليوميات لا تبنى على سلبيات بلد بعينه وانما هى تبنى بشكل عام لاستعراض مشكلات محددة – وخاصة التى تواجه مادة التربية الفنية - التى تحدث داخل أى منظومة تعليمية تابعة لاى بلد وذلك لمحاولة طرح الاقتراحات وابداء الآراء المختلفة من خلال القراء الاعزاء

وقد وضعت أسماء رمزية لكل معلم أو معلمة موجودة بتلك الأحداث لتسليط الضوء أيضا على الاخلاقيات المختلفة التى تكون سمة أساسية فى شخصية هذا المعلم أو المعلمة وليس بالضرورة أن يكون معلم سىء الخلق أو فاشل فى دوره كمعلم بشكل أساسى وكذلك عرض مشكلات الطلبة والعلاقة التى أصبحت غيرمرضية بين الطالب والمعلم ودور كل منهما فى ارجاع الثقة مرة اخرى فى العلاقة بينهما ووضع الضوابط والمبادىء لكل منهما واحترام كل منهما للآخر

وأخيرا أتمنى من الله تعالى أن يوفقنى لاتمام تلك اليوميات وأن يكون لها صدى عند المسئولين ليشعروا بأهمية دور معلم التربية الفنية الحقيقى وليس المهمش بشكل خاص و أهمية دور المعلم الرئيسى بشكل عام فى بناء شخصية الطالب السليمة

والتى سوف يعيد بها بناء هذه الامة من جديد بشكل نفخر به جميعا ويفخر به العالم